Dili, 19 Maiu 2021 – Sekretáriu Estadu ba Komunikasaun Sosiál (SEKOMS) Mericio Juvinal dos Reis Akara, ohin (19/5) iha Palásiu Governu, Dili, ofisialmente lansa plataforma dijitál ida ho funsaun atu halibur dadus kona-ba informasaun falsu ka HOAX sira ne’ebé espalla iha mídia sosiál.
“Ohin ita konsege lansa plataforma dijitál primeiru ho intensaun atu kolekta ka halibur informasaun falsu ka HOAX sira ne’ebé ID falsu sira ka ID loos balu loro-loron lansa iha mídia sosiál,” dehan Mericio Akara hafoin lansa tiha plataforma ne’e.
Mericio Akara esplika tán katak ho dadus sira ne’ebé jere iha plataforma ne’e sei ajuda atu halo planu hodi promove edukasaun sívika ba sidadaun sira tanba ohin loron ema prefere liu partilla informasaun falsu sira duké informasaun sira ne’ebé mai hosi mídia ka fonte kredível sira.
Fonte: Mídia Secretário de Estado Para a Comunicação Social (SECOMS)