Aileu, 29 Agostu 2023 - Sekretária Estadu Kooperativa (SEKOOP), Arsénio Pereira da Silva, apela ba grupu agrikultór Faularan no sira hotu iha Timor-Leste ne'ebé mak hetan apoiu hosi Ajénsia Kooperasaun Internasionál Korea Súl (KOICA, sigla inglés), inklui Organizasaun Non Governamentál (ONG) sira seluk, atu koopera malu hodi kontinua mantein no garante grupu nia sustentabilidade, bainhira ONG sira ne'e nia projetu remata. Arsénio hato'o apelu ne'e iha okaziaun tau fatuk dahuluk ba armazein ortikultura, iha aldeia Faularan, suku Seloi Kraik, postu administrativu Aileu vila, munisípiu Aileu.

"Hau aprésia tebes ho ajénsia internasionál KOICA hosi nasaun Korea ne'ebé mak durante ne'e suporta no forma ona ita-nia grupu komunidade sira, no husu ba grupu agrikultura sira labele fahe malu iha dalan klaran bainhira ajénsia ninia projeitu remata, maibe nu'udar Timoroan tenke iha inisiativa no kreatividade hodi jere didi'ak imi-nia grupu, tranforma sai kooperativa, hodi nune'e bele iha sustentabilidade ba iha futuru hodi kontribui ba kresimentu ekonómia família nian",  hateten SEKOOP.

Grupu agrikultura iha Faularan fahe ba parte rua, A no B ne'ebé mak iha tinan 2019 Ajénsia KOICA liuhosi projeitu Pilotu Hamutuk Dezenvolve Agrikultura iha Munisípiu Aileu, Likisa, no Ainaro (HADALA) iha área Faularan, Aileu ho ninia membru hamutuk ema nain atus-ida-haat (104), ne'ebé mak okupa rai hamutuk ektare 3,5, hodi hala'o atividade ortikultura kuda modo. Enkuantu projetu armazein produtu agríkola ne'e, sai hanesan meiu ida hodi garante kuantidade no kualidade modo nian, antes transfere ba merkadu sira iha Dili.