Dili, 02 Setembru 2021 – Servisu Investigasaun Kriminál Nasionál (SIKN) hamutuk ho Diresaun Jerál Migrasaun halo tán investigasaun ba sidadaun timoroan na’in-42 ne’ebé kompleta ona loron 14 iha kuarentena Tasi-Tolu hafoin hetan deportasaun hosi Indonézia iha fulan Agostu liubá tanba tama ilegál ba Indonézia liuhosi fronteira terestre entre Timor-Leste no Indonézia ho ba sa’e sintu arte-marsiál.
“Ohin ami ba foti sira na’in-42 iha kuarentena hodi halo prosesu identifikasaun,” Komandante Setór Operasaun, Servisu Migrasaun, Inspetór Luis do Carmo informa ba jornalista, ohin (02/9) iha Vila-Verde, Dili.
Luis dehan katak hafoin halo tiha investigasaun, Diretór Jerál Migrasaun sei fó-sai relatóriu identifikasaun iha tempu besik.
“Totál deporta hosi Indonézia mai ne’e iha ema na’in-703 no balu mak ita halo ona identifikasaun no balu hein sira kompleta kuarentena sei prosesa mós sira. Entaun bazeia ba dekretu Governu [...] no mós lei Migrasaun artigu 147 ita aplika multa máximu $250.00 ba sidadaun sira ne’ebé ho intensaun hakat fronteira ho ilegál,” Luis informa.
Fonte: Mídia Serviço Relações Públicas de Ministério do Interior