Dili, 01 Setembru 2023 - Komandante ba Programa Dezenvolvimentu Polísia Timor-Leste (TLPDP, sigla Inglés), Superintendente Darren Booy, hateten katak sira kontinua koopera ho governu Timor-Leste hodi apoiu ba iha área seguransa nian, liuliu atu moderniza instituisaun Polísia Nasionál Timor-Leste (PNTL), tanba ne'e iha tempu badak TLPDP ho Ministériu Interiór (MI) sei formaliza Memorandu Entendimentu (MoU, sigla inglés) kona-ba esbosu foun ida nu’udar oportunidade importante ba dezenvolvimentu profisionalizmu PNTL. Darren hato'o lia hirak ne'e hafoin enkontru ho Ministru Interiór, Francisco da Costa Guterres,  iha Sesta (01/09) iha Vilaverde, Dili.

“Ohin ami hasoru malu ho Ministru Interiór, ami ko'alia kona-ba oportunidade atu renegósia memorandu entendementu foun entre Austrália no Timor-Leste atu hetan apoiu hodi dezenvolve PNTL. Ami mós halo diskusaun klean no iha fulan balu nia laran ami sei halo enkuadramentu foun kona-ba kooperasaun servisu iha tinan lima oin mai”, dehan Komandante Darren Booy.

Governu hein katak ho mudansa balu liuhosi esbosu foun ne'ebé sei formaliza iha tempu badak, bele responde ba dezafiu sira ne'ebé mak durante ne'e PNTL hasoru. Enkuantu memorandu entendimentu foun ne’e atu haforsa setór seguransa entre Timór-Leste no Austrália ne’ebé antes ne’e hala’o tiha ona, hahú hosi tinan 2003 liuhosi kooperasaun entre PNTL no Polísia Federál Austrália.