Dili, 20 Abril 2021 – Universidade Nasionál Timor Lorosa’e (UNTL) planeia atu realiza graduasaun online iha fulan Maiu tinan 2021 ba finalista hamutuk na’in-633 hosi kontinjente tinan 2020 nian.
Informasaun ne’e divulgadu liuhosi karta ofisiál ho referénsia nú. 002/UNTL/VRAAGQ/IV/2021 ne’ebé sai hosi Gabinete Vise-Reitór ba Asuntu Akadémiku no Garantia ba Kualidade (VRAAGQ sigla portugés) iha tersa (20/4) ne’e.
“UNTL pretende realiza Graduação Virtuál (Online) ba nia finalista na’in-633, hosi kontinjente 2020 nian, iha fulan Maiu 2021,” deskreve iha karta refere.
Iha karta ne’e esplika, planu refere UNTL pretende tanba haree ba imposibilidade atu realiza Graduasaun Prezensiál hanesan baibain durante períodu pandemia ne’ebé kauza hosi Covid-19.
Tanba ne’e parte VRAAGQ solisita dirijente kada fakuldade atu rekolla dadus finalista ne’ebé aseita atu adere ba Gradusaun Virtuál.
Fonte: Mídia Universidade Nacional Timor Lorosa'e (UNTL)