Dili, 13 Jullu 2021 – Universidade Nasionál Timor Lorosa’e (UNTL) submete ona dadus estudante ne’ebé atu sai nu’udar benefisiáriu ba subsídiu propinas nian no pulsa durante implementasaun Serka Sanitária (SS) hamutuk na’in-23.500 ba Ministériu Ensinu Superiór, Siénsia no Kultura (MESSK) atu prosesa.
“Dadus hirak ne’e ita rekolla diretamente hosi administrasaun universidade nian, bazeia ba estudante ativu ne’ebé naran tama iha sistema ho totál 23.500, Reitór asina no submete ona ba Ministériu Ensinu Superiór, Siénsia no Kultura (MESSK) hodi prosesa subsídiu propinas no pulsa ba universitáriu sira durante implementasaun Serka Sanitária,” Vise Reitór ba Asuntu Akadémiku no Garantia Kualidade (VRAAGK) Samuel de Sousa Freitas informa ohin (13/7) iha kampus sentrál UNTL, Dili.
Samuel esplika, subsídiu propinas ne’e sei selu tuir kustu pagamentu estudante ida-idak nian hanesan, ba sira ne’ebé ativu mak $30.00 no livre teoria $5.00.
“Maibé nia prosesu keur uitoan tanba atu selu pulsa ba estudante sira presiza hatene númeru telefone maibé solusaun ne’e oinsá, ita hein desizaun hosi MESSK,” nia akresenta.
Fonte: Mídia Universidade Nacional Timor Lorosa'e (UNTL)