Batugade, 16 setembru 2022 - Servisu Sekreta hosi Unidade Patrullamentu Fronteira (UPF) kaptura Timoroan mane nain-rua ho naran inisiál CDH, tinan 32, hosi Dili no MDJS, tinan 24 hosi Ermera, ne’ebé halo tranzasaun ilegál ba motor ida tipu Honda Scoopy, iha fronteira terestre Timor-Leste ho Indonézia nian iha Batugade.
Komandante UPF, Euclides Belo, informa katak suspeitu nain-rua ne’e kaptura liuhosi operasaun rutina iha fronteira.
"Suspeitu nain-rua, ekipa halo vijilánsia durante oras ualu nia laran no kaptura iha oras tuku 11:08 kalan, bainhira sira hatama motor hosi mota sorin área Indonézia nian mai iha suku Batugade, postu-administrativu Balibo, munisípiu Bobonaru", informa Euclides Belo, iha ninia knaar fatin iha Kuartel UPF Nuu badak, ohin (16/09).
Euclides hatutan tán katak suspeitu nain 2 hamutuk ho evidensia motor asegura ona iha Kuartel UPF Fatuk Boot hodi halo identifikasaun, presta deklarasaun, hafoin sei entrega evidénsia no suspeitu sira ba Eskuadra PNTL Batugade hodi kontinua hala’o prosesu investigasaun.
Fonte: Mídia Serviço Relações Públicas de Ministério do Interior