Bobonaru, 14 Setembru 2021 – Vise Ministru Interiór (MI) António Armindo, hamutuk ho parteria permanente Polísia Nasion’al Timor-Leste (PNTL) Programa Dezenvolvimentu Polísia Timor-Leste (sigla ingles TLPDP), akompaña mós hosi Komandante Jerál PNTL Komisáriu Polísia Faustino da Costa ho nia ekipa, oberva direita fatin ba futuru konstrusaun postu seguransa Unidade Polísia Marítima (UPM) iha aldeia Migir postu-administrativu Balibó, munisípiu Bobonaru.
Aléin hosi ne’e, Vise MI ho ekipa ba observa mós futuru postu seguransa UPM iha aldeia Dair, postu-administrativu Maubara, Likisá, no iha suku Aidaba postu-administrativu Atabae, Bobonaru.
Iha observasaun, Vise MI hateten, prioridade atu harii postu UPM hotu-hotu ho modelu ida de’it, kompletu ho fasilidade, asesu ba dalan no eletrisidade hodi ajuda servisu UPM kontrola tranzasaun ilegál tama mai Timor-Leste.
Iha parte seluk, Komandante Jerál PNTL Faustino da Costa hateten, konstrusaun Postu UPM ne’e hodi kontrola tranzasaun ilegál ró hosi Indonézia mai Timor-Leste, tanba durante ne’e iha de'it postu temporáriu ba Unidade Polísia Marítima hodi hala'o seguransa.
Prosesu konstrusaun ba postu UPM ne’e hetan apoiu orsamentu hosi Polísia Federál Austrália liuhosi TLPDP, bazeia ba kooperasaun bilaterál entre Governu Australia no Governu Timor-Leste liuhosi Vise MI Antonio Armindo.
Fonte: Mídia Serviço Relações Públicas de Ministério do Interior