Dili, 28 Outubru 2021 – Eiz Komandante En Xefe FALINTIL Kay Rala Xanana Gusmão hakerek karta kondolénsia ba Max Stahl nia espoza Ingrid Bucens no família sira hodi hateten katak Max Stahl nu’udar inspirasaun ida ba Xanana durante momentu difísil balu iha Timor-Leste nia luta ba independénsia.

“Ha’u mós sei sente falta tebes ho Max (nia prezensa) ne’ebé ha’u admira tebes no ne’ebé sai hanesan inspirasaun ida mai ha’u durante tempu difísil tebes balu iha ami-nia luta,” Xanana dehan iha karta ne’ebé Timor News asesu ohin (28/10).

Iha parte dahuluk hosi karta ne’e, Xanana hateten katak Max Stahl nu’udar jornalista korajozu ida ne’ebé expóz injustisa no konta istória sira ne’ebé mundu presiza rona. Xanana konsidera katak Max ninia kontribuisaun sira liuliu ariska nia-an hodi halo filmajen ba opresaun no brutalidade iha masakre Santa-Krúz no filmajen seluk tán muda Timor-Leste nia destinu.

“Ha’u hatene ida ne’e nu’udar momentu difísil tebes ba ita-boot no família no ha’u hato’o ha’u-nia kondolénsia kle’an,” Xanana hakerek iha parte ikus hosi karta ne’e.

Christopher Wenner koñesidu ho naran Max Stahl, moris iha 06 Dezembru 1954 no hakotu-iis ohin tuku 04:30 iha Brisbane, Austrália, tanba moras komplikadu.