Vikeke, 21 Abril 2022 – Eiz Xefe suku Waimori, Américo Soares, hateten katak povu iha suku refere ne’ebé lokaliza iha postu-administrativu Vikeke Vila, Vikeke, durante ukun-an ne’e halerik beibeik ba Estrada no eletrisidade ne’ebé to’o oras ne’e kontinua sai hanesan difikuldade boot ida ba sira.

“Difísil tebes wainhira tempu udan ne’e estrada sira ne’e kareta labele liu ba mai, só ami ateru fali mak kareta bele liu. Prioridade liu mak estrada ne’e, Estrada di’ak ona mak bele halo tán buat sira seluk ne’e. Eletrisidade mós hanesan, uluk to’o agora dehan atu halo maibé atu halo ne’e ha’u la hatene halo bainhira. Durante ne’e komunidade sira sosa rasik Tenaga Surya hodi fó naroman netik ba sira nia oan sira kalan estuda,” Eiz Xefe suku ne’e informa, ohin (21/4) iha nia knua Waimori.

Nia mós husu ba Prezidente Repúblika foun ne’ebé eleitu atu konvense parte Governu hodi tau-matan ba sira-nia suku.

“Ba Prezidente foun ami husu halo netik ami-nia estrada ho eletrisidade ne’e,” nia husu.