Eskola São Miguel Seidauk Simu Kompensasaun Atu Husik Fatin Ba Projetu Estrada Rotunda-Tasi Tolu

Dili, 05 Marsu 2021 – Fundadór Eskola Koléjiu São Miguel Arcanjo Armindo Crisna Caetano hateten, Governu nia planu projetu konstrusaun estrada ne’ebé atu halo hosi Rotunda to’o Tasi-Tolu ne’e afeta ba Koléjiu São Miguel, tanba ne’e parte Governu promote ona kompensasaun ba São Miguel liuhosi karta konkordánsia hodi bele husik fatin ne’e ba projetu estrada refere, maibé to’o oras ne’e Governu seidauk transfere osan kompensasaun ba Koléjiu São Miguel.

“Planu projetu ne’e afeta ba edifísiu Koléjiu São Miguel Arcanjo inklui estasaun Televizaun Edukasaun (TVE). […] Ami asina tiha ona nota konkordánsia katak Governu sei halo kompensasaun ba Eskola Koléjiu São Miguel Arcanjo no estasaun TVE ne’ebé afetadu. […] Konkordánsia ne’e dehan tenke transfere ona osan mai ami nia konta, maibé realidade to’o agora Governu seidauk ezekuta konkordánsia ne’ebé abaixo assinado,” dehan Fundadór Armindo ba jornalista Timor News iha sexta (04/3) ne’e iha nia knaar-fatin Komoro, Dili.

Nia akresenta, osan Kompensasaun ne’e atu uza hodi harii fali edifísiu foun ba São Miguel iha fatin ne’ebé Governu rasik indika katak iha Seroja, Komoro, Dili.

Enkuantu osan kompensasaun ne’ebé São Miguel no TVE hetan diferente ka boot liu kompara ho uma-kain afetadu sira seluk nian.

Nune’e, Fundadór Armindo ezije ba Governu atu kumpri no asegura konkordánsia ne’ebé parte rua ne’e asina tiha ona.

Fonte: Timor News

Notísia Hotu-Hotu >