Membru F-FDTL Ida Ho Nia Feen Sai Hosi Dili Ba Manufahi Sein Karta Autorizasaun Hosi SIJK

Manufahi, 24 Marsu 2021 – Membru FALINTIL-Forsa Defeza Timor-Leste (F-FDTL) mane na’in ida (1) ho nia feen, iha tersa (23/3) ne’e sai hosi munisípiu Dili hodi ba tama to’o iha área munisípiu Manufahi nian sein karta autorizasaun hosi Sentru Integradu Jestaun Krize (SIJK).

Diretora Servisu Saúde Munisipál Manufahi, Florência Corte-Real Tilman, ohin (24/3) informa katak, membru F-FDTL ho inisiál MC ho nia feen inisiál MT ne’e tama iha área Manufahi ho objetivu atu lori susu-been ba sira-nia oan iha Same, maibé la lori karta autorizasaun hosi SIJK inkui rezutadu teste swab, tanba ne’e ekipa Komisaun Task-Force Covid-19 munisípiu Manufahi, iha tersa (23/3) kalan, lori kedas membru F-FDTL ho nia feen ne’e submete ba kuarentena iha Same, no ohin ekipa saúde haruka hikas sira na’in rua fila ba munisípiu Dili.

Enkuantu aktu refere membru F-FDTL ne’e halo iha momentu ne’ebé Governu aplika hela serka sanitária iha munisípiu Dili, no bandu sidadaun sira atu halo viájen ba munisípiu seluk sein karta autorizasaun hosi SIJK inklui teste swab, tanba mosu ona kazu transmisaun Covid-19 hosi sidadaun ne’ebé sai hosi Dili ba munisípiu seluk.

Fonte: Diáriu "Roman ba Sosiedade" Manufahi

Notísia Hotu-Hotu >