Governu Korea Prontu Apoiu Ministériu Defeza Timor-Leste

7 Outubru 2019, Ministru Defeza no Ministru Interior Interinu Brig-Gen (Ref) Filomeno da Paixão de Jesus simu inkontru kortezia husi Tenente Jenerál Lee Seokgu ne’ebé reprezenta Ministru Defeza Repúlika Korea no Brigadeiru Jenerál Seo Young-man ne’ebé reprezenta Xefe Estadu Maiór Forsa Armada Korea.

Iha inkontru refere, delegasaun Koreanu ne’e informa kona-bá sira-nia partisipasaun iha INTERFET iha tinan 20 liubá no sira senti haksolok ho progresu dezenvolvimentu iha Timor-Leste. Delegasaun Koreanu ne’e halo doasaun komputador 20 ba Ministériu Defeza no tinan oin sei aumenta tan doasaun komputador ba Ministériu Defeza. Tanente Jenerál Lee reitera kompromisu Koreanu nian hodi hametin liután koperasaun defeza ho Timor-Leste.

Ministru Defeza agradese ba kontribuisaun forsa Koreanu iha misaun manutensaun paz nian no rekoñese katak forsa Koreanu mós kontribui ba paz no estabilidade Timor-Leste. Forsa Koreanu 5 mak lakon vida bainhira halo misaun manutensaun paz iha Timor-Leste. La’os deit Timoroan mak kontribui ba paz no seguransa maibé komunidade internasionál hanesan forsa Koreanu mós kontribui maka’as ba paz no estabilidade iha Timor-Leste.

Ministru Defeza mós aproveita inkontru ne’e hodi hato’o pedidu ba Tanente Jenerál Lee, Prezidenti Universidade Nasional Defeza Koreanu hodi bele simu mós Timoroan husi Ministériu Defeza no F-FDTL ba frekuenta kursu iha Universidade Nasional Defeza Koreanu nian. Tanente Jenerál Lee simu pedidu refere no sujere ba Ministériu Defeza hodi kordena ho Embaixada Repúblika Korea iha Timor-Leste nian kona-bá nomeiasaun kandidatu hodi ba hala’o estudu iha Universidade refere iha Korea.

Fonte: Mídia Ministério da Defesa

Notísia Hotu-Hotu >