Servisu Saúde Manufahi Husu Hapara Provizóriu Sirkulasaun Komunidade Dili-Same

Manufahi, 25 Marsu 2020 - Diretóra Servisu Saúde Munisípiu Manufahi, Florência Tilman Corte-Real husu Administradór Munisipál ho komandante Polísia hodi hapara provizóriu sirkulasaun komunidade Dili-Same hodi prevene Covid-19 iha Manufahi.

Diretora hateten katak Timor-Leste rejista ona kazu Covid-19 pozitivu ida iha kapitál Dili tanba ne’e atu prevene labele da’et to’o iha Munisípiu Manufahi husu atu hapara provizóriu sirkulasaun komunidade ne’ebé hala’o viajen ba mai Dili-Same.

Responde ba ezijénsia ne’e Administradór Munisípiu Manufahi Arantes Isaac Sarmento hateten katak administrasaun sei foti medida ba asuntu ne’e bainhira iha ona desizaun husi Prezidenti Repúblika hodi dekreta ona estadu emerjénsia no mós karik mosu ona kazu Covid-19 ho volume ne’ebé aas iha kapitál Dili.

Fonte: Jornalista Konjunta Manufahi (JKM)

Notísia Hotu-Hotu >