Xina: Norovirus Infekta Tán Estudante Na’in-30 Iha Provínsia Fujian

Xina, 18 Novembru 2020 – Norovirus infekta tán estudante na’in-30 hosi eskola Fuzhou 40, iha provínsia Fujian, haktuir informasaun hosi mídia Detik News ne’ebé publika iha tersa (17/11) ne’e.

Komunidade ida hosi Fuzhou informa mós ba mídia lokál Strait News katak, estudante barak hosi eskola refere mak sofre hela diaréia dezde tersa ((10/11) semana liubá. Hosi parte eskola nian hateten katak diaréia ne’e kauza hosi infeksaun norovirus.

“Estudante hotu-hotu iha ne’e hán iha eskola, entaun ami suspeita katak iha erru balu ho hahán hosi refeitóriu eskola nian. Eskola ne’e ikus mai taka tiha durante loron rua”, dehan komunidade hosi Fuzhou ne’e, ho naran bolu Chen.

Zhang, nu’udar Diretór eskola ne’e, konfirma katak mosu ona surtu norovirus ne’ebé konsentra iha eskola refere.

Nia diskorda katak surtu norovirus ne’e akontese tanba saneamentu ne’ebé la di’ak iha eskola ne’e. Zhang akredita, infeksaun norovirus nu’udar problema epidemiolójiku no laiha relasaun ho hahán ne’ebé sira hán iha eskola.

Molok ne’e, iha fulan ne’ebé hanesan (Novembru), surtu norovirus mós ataka universidade ida iha provínsia Shanxi, Xina Norte.

Fonte: Detik News

Notísia Hotu-Hotu >