MAPKOMS Vizita Rádiu Komunidade Kafé Ermera Hodi Haree Direita Nia Kondisaun

Dili, 19 Novembru 2020 – Ministru ba Asuntu Parlamentár no Komunikasaun Sosiál (MAPKOMS) Francisco da Costa Jerónimo ho nia komitiva, iha kinta (19/11) ne’e, vizita Rádiu Komunidade Kafé Ermera, iha Glenu, hodi haree direitamente kondisaun no situasaun reál kona-ba funsionamentu servisu iha rádiu komunidade refere.

Iha vizita ne’e, Jestór Rádiu Komunidade Kafé Ermera, Bento dos Santos Martins, hato’o preokupasaun sira ne’ebé mak rádiu komunidade ne’e hasoru, liuliu kondisaun edifísiu ne’ebé ladún di’ak, problema eletrisidade no funsionáriu voluntáriu sira ne’ebé oras ne’e hala’o hela sira-nia knaar hanesan jornalista iha rádiu komunidade ne’e.

Prezidente Konsellu Rádiu Komunidade Kafé Ermera, Paulo mós husu atu Governu liuliu MAPKOMS fó formasaun ba jornalista no tékniku sira ne’ebé servisu voluntariamente iha rádiu komunidade ne’e.

Ba preokupasaun sira ne’e, MAPKOMS fó resposta katak, sei fó solusaun fazeadamente ba problema no difikuldade sira ne’ebé rádiu komunidade ne’e hasoru, inklui rekomendasaun ne’ebé sira hato’o liuhosi Orsamentu Jerál Estadu hodi sustenta funsionamentu servisu iha estasaun rádiu komunidade ne’e.

Relasiona ho problema infraestrutura, Francisco Jerónimo hateten katak seidauk bele rezolve iha tinan 2021, maibé nafatin tau iha konsiderasaun, enkuantu kona-ba problema eletrisidade sei kontakta ho EDTL atu buka solusaun.

Fonte: Ministério dos Assuntos Parlamentares e Comunicação Social (MAPCOMS)

Notísia Hotu-Hotu >