Governu Timor-Leste Kongratula Prezidente EUA Foun Ne’ebé Simu Ona Posse

Dili, 21 Janeiru 2021: Primeiru-Ministru Timor-Leste Taur Matan Ruak iha kinta (21/01) ne’e lori Governu Timor-Leste nia naran hodi hato’o kongratulasaun ba Prezidente eleitu foun Estadus Unidus Amérika (EUA) nian Joe Biden no Vise Prezidente EUA Kamala Harris ne’ebé simu ona posse iha kuarta (20/01) ne’e hodi sai nu’udar Prezidente no Vise Prezidente EUA nian ba dala-46.

“Dala ida tán, lori ha’u no Governu Timor-Leste nia naran, ha’u hakarak hato’o kongratulasaun sinseru ba Joe Biden no Kamala Harris ne’ebé simu ona posse nu’udar Prezidente no Vise Prezidente EUA nian ba dala-46.  Ha’u nia Governu sei haksolok atu kontinua koopera ho ita-boot sira-nia Governu iha setór saida de’it,” Taur hakerek no divulga iha nia konta ofisiál Twitter.

BBC haktuir, ho tomada posse ne’ebé hala’o iha kuarta (20/01) ne’e iha edifísiu Capitol, EUA, Joe Biden no Kamala Harris ofisialmente lidera ona nasaun refere ba mandatu tinan haat (4) hodi troka fali Donald Trump.

Fonte: Mídia Gabinete do Primeiro Ministro (GPM)

Notísia Hotu-Hotu >