Aban Traballadór Timoroan Na’in-20 Aranka Ba Servisu Iha Austrália

Dili, 23 Fevereiru 2021 – Líder Máximu Sekretaria Estadu Formasaun Profisionál no Empregu (SEFOPE) halo despedida ho traballadór timoroan hamutuk na’in ruanulu (20), ohin (23/02) iha salaun SEFOPE, Dili, tanba aban sira atu aranka ba servisu iha Austrália.

Iha serimónia despedida ne’e, Líder Máximu SEFOPE hateten iha nia intervensaun katak, traballadór na’in-20 ne’e la’os foun maibé uluk sira ba servisu tiha ona iha Austrália, no hatudu prestasaun di’ak, tanba ne’e kompañia bolu hikas sira atu ba kontinua servisu, nune’e aban sira aranka.

Nia mós husu ba traballadór sira atu ba servisu ho di’ak no rai osan nune’e fila mai bele hadi’a ekonomía família nian no mós ekonomía Nasaun Timor-Leste nian.

Traballadór timoroan na’in-20 ne’e kompostu hosi mane na’in sanulu resin ualu (18) no feto na’in rua (2), nune’e na’in sanulu resin tolu sei ba servisu iha kompañia ADCO no na’in hitu (7) iha kompañia Connect group.

Fonte: Mídia Secretariado de Estado para Formação Profissional e Emprego (SEFOPE)

Notísia Hotu-Hotu >