Governu Japaun Sei Reabilita Eskola Téknika Dom Bosco Fatumaka No EBF Fatulaun

Dili, 23 Fevereiru 2021 – Governu Japaun liuhosi programa Grant Assistance For Grassroots Human Security Project (GGP), sei implementa projetu reabilitasaun ba Eskola Téknika Dom Bosco Fatumaka ne’ebé lokaliza iha Baukau no Ensinu Báziku Filiál (EBF) Fatulaun ne’ebé lokaliza iha munisípiu Manatutu.

Tanba ne’e, ohin (23/2) iha edifísiu Embaixada Japaun, Praia dos Coqueiros, Dili,  Governu Japaun liuhosi nia Embaixadór iha Timor-Leste, Kinefuchi Masami, ho Diretór Eskola Téknika Fatumaka, no Fundasaun Leobalu, asina ona akordu ba implementasaun projetu reabilitasaun eskola ne’e liuhosi programa GGP.

“Futuru Nasaun nian sai di’ak, wainhira kondisaun eskola di’ak, no kondisaun eskola di’ak sei fasilita tebes estudante sira aprende ho di’ak”, dehan Embaixadór Kinefuchi iha fatin hanesan.

Iha seremónia asinatura ne’e, Ministru Edukasaun, Juventude no Desportu Armindo Maia, no Ministru Turizmu, Komérsiu no Indústria José Lucas do Carmo mak sai hanesan sasin ba asinatura projetu refere.

Molok ne’e, Governu Japaun liuhosi programa GGP, implementa tiha ona projetu hamutuk 124 iha Timor-Leste hahú hosi tinan 2000.

Fonte: Ministério do Turismo, Comércio e Indústria (MTCI)

Notísia Hotu-Hotu >