Prokuradór Jerál Husu Governu Apoiu Timoroan Detein Iha Prizaun Indonézia

Díli,07 outubru 2019 - Prezidente Repúblika, Francisco Guterres Lú Olo hala’o enkontru mensál ho Prokuradór Jerál Repúblika, José da Costa Ximenes ne’ebé iha sorumutu ne’e relata atividade no servisu sira Ministériu Públiku nian hosi fulan-setembru to’o inísiu fulan-outubru ne’e.

Entre servisu sira ne’e, Prokuradór José Ximenes relata ba Xefe Estadu mak hanesan abertura vaga-servisu Ofisiál Justisa hamutuk 24, tuir desizaun Konsellu Superior Ministériu Públiku ne’ebé hahú ohin (07/10), vizita Prokuradór Estadus Unidus Amérika iha ámbitu kooperasaun entre prokuradoria jerál nasaun rua ne’ebé estabelese ona durante tinan-10 no ko’alia mós prosesu justisa ba timoroan sira ne’ebé involve kazu krime iha Indonézia.

Tuir Prokuradór Jose Ximenes, kazal timoroan ne’ebé hetan detensaun tanba kazu droga iha Atambua fulan hirak liubá, oras ne’e, sira-nia estatutu hanesan prizaun preventiva no kazu omésiu estudante timoroan iha Yogjakarta, autoridade Indonézia detein ona ema na’in tolu ho estatutu prizaun preventiva.

Prosesu investigasaun ba sidadaun timoroan sira ne’e, tuir Prokuradór José Ximenes kontinua la’o no nia parte kontinua hakbesik-an ba autoridade kompetente Indonézia, liuhosi Embaisada Timor-Leste iha Jakarta, hodi hato’o disponibilidade servisu hamutuk no haree posibilidade ba prosesu investigasaun konjunta entre autoridades nasaun rua.

“Se mak bele toma konta, mak loloos governu. Arguidu sira-nia família eskolla ona advogadu mas governu mós bele haree posibilidade saida mak bele halo hodi tulun nia sidadaun ne’ebé komete krimi iha estranjeiru (...) la’os prokuradoria jerál. Ami haree mak kestaun bele ga lae ita dezenvolve investigasaun konjunta i to’o ohin loron seidauk iha informasaun hosi autoridade sentrál (Indonézia) ba Embaixada Timor-Leste iha Jakarta”, afirma Prokuradór Jose Ximenes, ba imprensa hafoin enkontru ho Prezidente Francisco Guterres Lú Olo.

Fonte: Mídia Presidente da República (PR)

Notísia Hotu-Hotu >