MEJD: Atu Dezenvolve Edukasaun Ho ICT Presiza Internet Ne’ebé Baratu No Lalais Liu

Dili, 26 Outubru 2020 – Ministru Edukasaun, Juventude no Desportu (MEJD) Armindo Maia hateten katak atu halo inovasaun ba edukasaun utiliza Teknolojia Informasaun no Komunikasaun (sigla inglés ICT) iha Timor-Leste, presiza tebes fasilidade internet ne’ebé lalais no baratu liu, tanba ne’e Governu hamutuk ho parseiru sira presiza servisu maka’as hodi atinje ida ne’e, hodi fasilita ema hotu-hotu bele asesu ba edukasaun ida ne’ebé kualidade to’o iha área rurál sira.

MEJD hato’o ida ne’e ba jornalista sira, ohin (26/10), hafoin halo tiha konferénsia dahuluk kona-ba ICT no Inovasaun Edukasaun, iha CCD.

Armindo Maia hatutan tán, “MEJD nafatin dezenvolve buat sira ne’e maibé labele la’o mesak de’it, presiza apoiu hosi parseiru sira hotu, Governu, komunidade. Atu dezenvolve IT ne’e primeiru presiza osan, presiza fasilidade barak, karik aban bainrua ita iha kabu fibra ótika dalaruma (internet) bele lalais liu”.

Konferénsia kona-ba ICT no Inovasaun Edukasaun ne’ebé realiza liuhosi kolaborasaun entre UNICEF Timor-Leste no MEJD ne’e sei halo durante loron rua, tanba ne’e sei kontinua tán iha 27 Outubru 2020.

Fonte: Timor News

Notísia Hotu-Hotu >