Regra EE Foun Bandu Atu Labele Halibur Malu Liu Ema Nain-10

Dili, 29 Dezembru 2020 - Konsellu Ministrus iha sorumutuk estraordináriu, aprova ona projetu Dekretu Governu nian, ne’ebé aprezenta hosi Primeiru-Ministru ein ezersísiu, José Maria dos Reis, kona-ba alterasaun dahuluk ba Dekretu Governu n. 18/2020, husi loron 3 fulan-dezembru, kona-ba medida sira ba ezekusaun Deklarasaun Estadu Emerjénsia (EE) ne’ebé efetua husi Dekretu Prezidente Repúblika n. 70/2020, husi loron 3 fulan-dezembru.

Alterasaun ne’e halo hodi hatán ba agravamentu situasaun sanitária iha provínsia Timor Osidentál, iha Repúblika Indonézia nian, ne’ebé konta ona ema 1.700 hetan kazu pozitivu husi COVID-19, no deskobre tipu foun SARS-CoV-2, ne’ebé sei iha tan kontajioza duke orijinál, no mós tanba aumentu númeru kazu ne’ebé diagnóstika iha territóriu nasionál.

Ho alterasaun ida-ne’e, sei define filafali regra sira distansiamentu sosiál nian, ba indivídu hotu-hotu ne’ebé hela iha Timor-Leste atu (1) Obrigatóriu mantein distánsia pelumenus metru ida ba ema seluk, katak la moris ho ekonomia komún (hela iha uma hanesan), bainhira sirkula la’o ain iha dalan públika ka tama iha resintu, públiku ka privadu sira, hosi asesu públiku no utilizasaun koletiva; (2) Labele halibur malu liu ema nain sanulu, exetu sira pertense ba sira-nia agregadu família; (3) La organiza nein partisipa iha eventu ka selebrasaun sira ne’ebé envolve aglomerasaun liuhosi ema nain sanulu, exetu sira pertense ba sira-nia agregadu familiár; (4) Utiliza máskara ne’ebé taka inus no ibun bainhira la’o iha dalan públika ka tama ka hela iha resintu públiku ka privadu husi asesu públiku no utilizasaun koletiva no, bainhira uza kualkér transporte públiku ba pasajeiru sira; (5) Fase liman bainhira hakarak tama ka hela iha resintu públiku ka privadu sira husi asesu públiku no utilizasaun koletiva.

Fonte: Mídia Gabinete do Primeiro Ministro (GPM)

Notísia Hotu-Hotu >