Dili, 04 Janeiru 2021 – Koordenadora Jerál Covid-19 Odete da Silva Viegas informa liuhosi konferénsia imprensa ne’ebé realiza iha Palácio das Cinzas ohin (04/01) katak, mosu tán kazu foun Covid-19 tolu (3), no iha mós pasiente na’in neen (6) ne’ebé rekuperadu ona.

Nia esplika, pasiente foun Covid-19 na’in tolu ne’ebé pozitivu ne’e ho sexu mane hotu, no sira mai iha Timor-Leste hosi Malázia iha loron 21 no 22 fulan Dezembru tinan kotuk.

Relasiona ho pasiente hirak ne’ebé rekuperadu ona Odete hateten katak sira alta ona hosi izolamentu Vera-krúz no Ministériu Saúde entrega ona ba sira-nia família.

Tanba ne’e, pasiente pozitivu Covid-19 ne’ebé baixa hela oras ne’e hamutuk na’in sanulu resin rua (12).