Dili, 12 Janeiru 2021 – Olivio Freitas nu’udar Prezidente Autoridade Munisipál Baukau foun, simu ona posse hosi Ministru Administrasaun Estatál (MAE) Miguel Perreira de Carvalho, ohin (12/01) iha Baukau, hodi troka fali Prezidente Autoridade Munisipál Baukau sesante Antonio Guterres.

Ho tomada posse ne’e, Olívio Freitas sai fali nu’udar reprezentante Governu sentrál iha Baukau, hodi lidera no dirije Administrasaun Munisipál no asegura funsionamentu servisu Administrasaun Lokál Estadu nian atu responde ba atividade hotu-hotu perante membru Governu ne’ebé responsabiliza Administrasaun Estatál.

“Servisu ne'ebé Prezidente Autoridade foun atu hala’o ba oin ne’e todan, Servisu ne'e ezijente tebes no ezije ita-nia esforsu atu ho badinas bele serví ema hotu,” dehan MAE iha nia diskursu.