Ekipa Reitorál Foun UNTL Husu Primeiru-Ministru Nia Akonsellamentu Atu Lori UNTL Ba Oin

Dili, 08 Fevereiru 2021 – Ekipa Reitorál foun hosi Universidade Nasionál Timor Lorosa’e (UNTL) ba períodu 2021-2026 ne’ebé lidera hosi Reitór João Soares Martins, ohin (08/02), aprezenta-an ba Primeiru-Ministru Taur Matan Ruak iha Palásiu Governu, Dili, hodi husu mós Primeiru-Ministru nia akonsellamentu ba ekipa atu lori UNTL ba oin ho di’ak liután.

“Ohin ami mai aprezenta-an ba Sr. Primeiru-Ministru kona-ba Reitorál estrutura foun, no ami husu mós Sr. Primeiru-Ministru nia akonsellamentu ba ami oinsá mak ami bele lori UNTL ne’e ba oin di’ak liután, ida ne’e mak ohin ami ko’alia. Ami kontente tebes tanba Sr. Primeiru-Ministru ko’alia ho ami barak tebes no ne’e hatudu katak Sr. Primeiru-Ministru hakarak UNTL ne’e ba oin, setór Edukasaun tenke ba oin,” dehan Reitór João Soares Martins ba imprensa, hafoin remata sorumutuk ho Primeiru-Ministru.

Entretantu Primeiru-Ministru fó votu felisitasaun no dezeju susesu ba ekipa Reitorál foun UNTL nian durante kaer mandatu, hodi akresenta katak, importante halo planeamentu di’ak atu iha futuru UNTL bele sai universidade kualifikadu ne’ebé mós prodúz matenek kualifikadu.

Fonte: Mídia Gabinete do Primeiro Ministro (GPM)

Notísia Hotu-Hotu >