Guinea Enfrenta Pandemia Virus Ebola Ho Kazu Infektadu 7 No Mate 3

Guinea, 14 Fevereiru 2021 – Guinea nasaun ida ne’ebé lokalizada iha Áfrika Oeste, rejista kazu ema na’in hitu (7) konfirmadu infektadu virus ebola no na’in tolu (3) mate, haktuir The Guardian ohin (14/2).

“Foin dadeer-saan de’it laboratóriu Conakry konfirma katak deteta virus ebola,” Xefe Ajénsia Saúde Guinea Sakoba Keita informa, hafoin sira realiza tiha reuniaun emerjénsia ida iha kapitál.

Sakoba akresenta, ema ida mate tanba ebola iha fín Janeiru 2021 ne’e iha Gouechke, besik fronteira Libéria, hakoi iha 01 Fevereiru no ema balu ne’ebé marka prezensa iha serimónia fúnebre ne’e hetan sintoma diareia, laran-sa’e no isin-manas.

Teste ba ema hirak ne’e halo iha laboritóriu Uniaun Europeia nian iha Gueckedou, no deteta katak sira balu infetadu hosi vírus ebola, tanba ne’e Sakoba dehan, oras ne’e Guinea enfrenta pandemia ebola.

Nune’e, Organizasaun Mundiál ba Saúde (OMS) mós haruka ona nia reprezentante hodi akompaña situasaun iha nasaun refere liuliu relasiona ho ebola.

Fonte: Mídia Gabinete do Primeiro Ministro (GPM)

Notísia Hotu-Hotu >