Dili, 26 Fevereiru 2021 – Universidade Nasionál Timor Lorosa’e (UNTL) liuhosi nia Sentru Estudu Jéneru (SEJ), ohin (26/2), organiza atividade kuda ai-kasi oan hamutuk atus ida (100) iha Jardín Motael, Dili, ne’ebé partisipa mós hosi Reitór UNTL João Soares Martins no Líder Igreja Katólika iha Timor-Leste.

Reitór UNTL hateten, “inisiativa kuda ai-oan ne’e ho objetivu atu enkoraja komunidade sira hodi kuda ai-oan atu hamatak ambiente iha sidade Dili”.

Enkuantu Arsebispu Metropolitanu Dili, Dom Virgilio do Carmo, ne’ebé partisipa mós iha atividade ne’e hateten, “atividade ne’e furak tebes [...] joven sira presiza promove kuda ai-oan, no haka’as-an atu fó liman ba malu hodi hamatak liután ita-nia rain liuhosi ai-kasi ne’ebé ita kuda”.

Atividade kuda ai-oan ne’e partisipa mós hosi Polísia Eskuadra Munisípiu Díli, Universitáriu sira, inklui estudante ensinu sekundáriu sira.