Ró Akademia Naval Qi-Jiguang Husi Xina mai vizita Timor–Leste

Díli, 7 Outubru 2019 - Ró Akademia Naval Qi-Jiguang Xina nian mai vizita Timor –Leste iha ámbitu selebra loron aniversáriu Repúblika Popular Xina ba dala-70. Ró Akademia Naval sei para iha Timor durante loron tolu nia laran hodi fó oportunidade ba Forsa Naval atu ba vizita hodi aprende buat ruma iha Ró refere.

Ministru Defeza no Ministru Interior Interinu, Filomeno da Paixão hatete, sira husu autorizasaun ba governu atu mai vizita no forsa naval Timor-Leste sira mós bele ba halo vizita hodi haree no aprende buat balun, nune’e mós ba populasaun sira bele mai vizita hodi haree buat balun iha laran, tanba sira lori teknolojia ne’ebé aas haree hodi aprende.

“Vantazem husi vizita ró Qi-Jiguang ne’e barak tebes tanba ita nia forsa na’in 18 mak aprende ona iha akademia naval ne’eba nian no agora dadaun ita iha kadetas ida mak sei aprende hela iha ne’eba, ita nia relasaun ho Xina dia’k tebes” dehan Ministru Defeza liu husi entervista ho jornalista sira bainhira halo vizita ba ró refere iha Portu Dili, Segunda-feira (7/10/2019).

Ministru Defeza haktuir liután, ró akadémia ne’e  bele akumula ema too atus lima (500) no iha ró laran kadetas sira besik atus rua (200) ne’ebé tuir aula prátika iha ró laran.

Ró naval ne’e viazem husi Brunei liu mai iha Timor-Leste depois sei kontinua ba  Novazelandia sei ba tan rai seluk iha sub-pasifiku.

Ohin estrutura Defeza no estrutura F-FDTL ba hatoo komprementa boas vindas simu ho dansa kultura husi grupu Lezeval no kultura Xina nian, depois hala’o vizita direita ba ró laran hodi haree ekipamentus ne’ebe uza teknolojia aas, tanba ne’e Xina fó oportunidade ba komunidade sira bele mós ba halao vizita.

Fonte: Mídia Ministério da Defesa

Notísia Hotu-Hotu >