Prezidente Repúblika Kongratula Profisionalizmu No Dedikasaun F-FDTL

Díli, 2 Fevereiru 2020 – Prezidente Repúblika (PR) Francisco Guterres Lú Olo, ne’ebé mós hanesan Komandante Supremu F-FDTL, iha diskursu selebrasaun loron aniversáriu F-FDTL ba dala-19 kongratula F-FDTL ninia profisionalizmu no dedikasaun tomak hodi serbí no hakbesik-an ba sidadaun hodi tane a’as interese nasional.

“Ohin ha’u hakarak saúda mós ita-nia asua’in Kombatentes Libertasaun Nasionál tanba Nasaun ida ne’e hamriik ho sira. Nu’udar Prezidente Repúblika no imi-nia Komandante Supremu, ha’u hato’o kumprimentus ba imi hotu-hotu ne'ebé sei ativu hela iha ita-nia Forsa Defeza. Ha’u fó parabéns ba imi-nia profisionalizmu no dedikasaun tomak hodi serbí Rain ida-ne’e, ba imi-nia esforsu hakbesik-an ba sidadaun sira no tane aas ita-nia interese nasionál.

FALINTIL-FDTL harii tinan 19 liubá. Ita presiza hanoin hikas kona-ba dalan naruk ne'ebé ita liu ona to’o ohinloron hodi buka komprende kona-ba dalan sira-ne’ebé ita hili, hanoin klean kona-ba tempu ohin nian no oinsá ita lao ba oin hodi hadi’a ba beibeik ita-nia instituisaun ida ne’e.

Ita-nia luta libertasaun nasional durante tinan ruanulu-resin-haat husik hela legadu ida nakonu ho aten-barani, domin ba Pátria no sakrifísiu husi jerasaun ida ne'ebé hatene tuba rai metin, hatene tahan terus no hatene sakrifika-an tomak hodi luta ba objetivu ida de'it: Povu Timor-Leste tenke ukun-rasik an.

Istória FALINTIL-FDTL nian kahor ho istória harii ita-nia Rain no ita-nia Identidade Nasionál no nune’e, ita iha istória ida de’it. Istória ne’e mak ita-nia istória luta ba independénsia no liberdade; istória ne’ebé ita-nia Gloriozas FALINTIL halo ho ligasaun metin ba povu no rai, ba Komunidade no ba rai-lulik ne’ebé imi hotu-hotu jura atu defende”.

Prezidente Repúblika konklui diskursu hodi deklara katak, prontu hamriik iha F-FDTL nia sorin iha tempu di’ak no susar.

 

Fonte: Mídia Presidente da República (PR)

Notísia Hotu-Hotu >