MEJD Ofisialmente Anunsia Feriadu Estraordináriu Semana Ida Ba Eskola Hotu-Hotu

Dili, 22 Marsu 2020 – Bazeia ba Konferénsia imprensa Direita ka Live ne’ebé hala’o hosi Ministra Edukasaun, Juventude no Desportu (MEJD), Dulce de Jesus Soares, iha oras 12:15, deklara loloos ona katak Feriadu semana ida, hahú hosi 23 to’o 28 Marsu ba eskola públiku, eskola privadu, eskola katólika no fundasaun sira, relasiona ho rezultadu Covid-19 pozitivu ida iha Timor-Leste, ne’ebé deklara horisehik, hosi Ministériu Saúde.

“MEJD hafoin koordena ho gabinete Sua Eselénsia. Sr. Primeiru-Ministru no Ministériu Saúde, determina feriadu ekstraordináriu hahú loron 23 de Marsu to’o 28 de Marsu ba eskola públika sira hotu no eskola privada sira ne’ebé integra iha rede públika, eskola katólika sira, no fundasaun, liuhosi despaixu ministeriál Nú. 9, Gabinete Ministra, Ministra Edukasaun Juventude no Desportu, Marsu 2020”, Dulce deklara.

MEJD hatutan, “Desizaun ne'e Hala’o iha mahan kompeténsia Ministra Edukasaun Juventude no Desportu Relasiona ho determinasaun ba kalendáriu eskolár, bazeia ba artigu 50, dekretu lei Nú. 03/2015 14 de Janeiro, no dekretu lei Nú. 04/2015 14 de Janeiro. Ministériu Edukasaun Juventude no Desportu sei dezenvolve hela métodu ensinu aprendizajen husi distánsia, no hein katak sei bele hahú implementa semana oin”.

MEJD hateten, féria eskolár ne’e la’os atu halimar maibé atu hela iha uma no halo tuir planu padraun ijiéne nian.

“Tuir rekomendasaun husi ministériu da saúde, hakarak empatiza katak féria eskolár ne’ebé sei hahú iha 23 to’o 28 fulan Marsu la’os atu halimar maibé atu hela iha uma no halo tuir planu padraun ijiéne nian ne’ebé fó sai ona iha MEJD nia sirkulár Nú. 3/2020 no regra ofisiál sira husi Ministério da Saúde”, dehan Dulce.

Fonte: Mídia Ministério da Educação, Juventude e Desporto (MEJD)

Notísia Hotu-Hotu >