Papa Francisco Preokupa Ho Polítiku Finjidu Buka Popularidade Iha Situasaun Krize

Dili, 09 Abríl 2020 – Líder Vatikanu, Papa Francisco, hateten katak surtu virus Corona ne’e natureza nia maneira ida hodi halo asaun hasoru ema ne’ebé ignora ambiente nia estragus.

“Ita la halo asaun hasoru dezastre balu ne’ebé mosu. Se mak oras ne’e ko’alia kona-ba inséndiu florestál iha Austrália, ka se mak hanoin kona-ba notísia fulan 18 liubá iha ró ne’ebé bele hakat liu Pólu Norte tanba Jelu ne’ebé nabeen? Se mak agora ko’alia kona-ba inundasaun?”, dehan Papa Francisco.

“Ha’u la hatene ida ne’e natureza nia vingansa ka lae, maibé konserteza  katak ida ne’e natureza nia maneira hodi responde”, hatutan Papa Francisco.

Papa Francisco hateten katak iha situasaun hanesan ne’e tuir loloos ema ne’ebé iha kbiit tenke tulun maluk sira ne’ebé kiak, liuliu ema sira ne’ebé uma laiha. Nia espera katak ema ne’ebé uma laiha bele tama kuarentena iha Otél duké iha fatin estasionamentu veíkulu sira.

Alein hosi ne’e, Papa Francisco mós alerta ba polítiku na’in sira ne’ebé buka popularidade iha kondisaun krize nia laran, no sira ne’ebé luta hodi buka lukru.

“Ha’u preokupa ho polítiku na’in laran makerek sira ne’ebé ko’alia hela kona-ba krize, kona-ba hamlaha iha mundu, maibé iha momentu ne’ebé hanesan, sira halo fali kilat”, dehan Papa Francisco.

Papa mós husu abintante hotu-hotu iha mundu atu uza tempu ho di’ak iha tempu lockdown no krize ohin loron.

Fonte: CNN Indonesia

Notísia Hotu-Hotu >