Arsénio: Oekusi Oan Sira Labele Hakat Ba Fronteira Tanba Risku Ba Covid-19

Dili, 07 Agostu 2020 - Primeiru-Ministru Taur Matan Ruak, simu iha audénsia, Prezidente RAEOA Arsénio Paixão Bano, hamutuk ho Sekretériu Rejionál sira, hodi informa ba Xefe Governu kona-ba servisu ne'ebé Autoridade RAEOA sira halo iha Oekusi.

Hafoin sorumutuk, Prezidente RAEOA ne'e apela ba povu atoni sira atu labele hakat ba fronteira tanba sei hamosu risku atu hada'et hikas moras Covid-19 mai Timor-Leste.

"Ami halo apelu beibeik ba Oekusi oan sira, máskara tenke uza nafatin, labele naran hakat tun sa'e ba fronteira tanba selae moras ne'e (Covid-19) bele hada'et hosi se de'it, labele halo kontaktu ho ema mai hosi rai-li'ur, tenke la'o tuir regra, distánsia fízika tenke halo", informa Arsénio Bano.

Prezidente RAEOA husu mos atu povu atoni nafatin kumpri regra ba prevensaun Covid-19 no hakru'uk ba regulamentu hosi Estadu Emerjénsia da-haat.

Fonte: Mídia Gabinete do Primeiro Ministro (GPM)

Notísia Hotu-Hotu >