Tempu Seidauk To’o Atu Selebra Vitória Kontra Covid-19

Dili, 15 Setembru 2020 – Prezidente Repúblika Francisco Guterres Lú Olo hateten, maske pandemia Covid-19 seidauk hamate ema ida iha Timor-Leste, maibé tempu seidauk to’o atu selebra vitória. Lú Olo informa ida ne’e iha okaziaun  abertura III Sesaun Lejizlativa ba V Lejizlatura Parlamentu Nasionál nian, ohin, iha Parlamentu Nasionál.

“Moras ne’e (Covid-19) infeta ona liu ema millaun 29 iha mundu tomak no halo ona ema liu na’in rihun 900 mate. Hosi fulan Marsu to’o ohin-loron, Timor-Leste rejista ona kazu konfirmadu 27. Hosi totál ne'e, 26 mak rekupera ona no nein ema ida mate to’o ohin-loron. Maski nune'e, seidauk to’o tempu atu selebra vitória. Corona virus sei la’o maka’as hela no ita seidauk hatene wainhira mak pandemia ne’e lakon iha mundu”, dehan Prezidente Repúblika.

Xefe Estadu hatutan, tanba vírus ne'e maka’as tebes, presiza matan moris nafatin. Se la kuidadu, bele lakon vida barak. 

Nune’e, Prezidente Repúblika apela nafatin ba Povu Timor-Leste tomak atu matan-moris ho neon-matenek hodi labele sobu fali esforsu sira ne’ebé halo ona ho konsiénsia tomak to'o ohin-loron.

Fonte: Mídia Presidente da República (PR)

Notísia Hotu-Hotu >