Eletrisidade Hamate Tán Tékniku EDTL Ida, MOP: Tékniku EDTL Nu’udar Erói No Merese Hetan Respeitu

Dili, 16 Outubru 2020 – Ministru Obras Públikas (MOP) Salvador dos Reis Pires, hato’o sentidu kondolénsia profunda ba família hosi matebian José Afonso das Neves, nu’udar tékniku Eletrisidade Timor-Leste (EDTL) nian ida, ne’ebé hakotu-iis tanba hetan soke hosi korente elétrika wainhira nia hala’o hela servisu hodi atende liña Media Tensaun (MT) ne’ebé kotu iha área Alawa-Afaguia, postu-administrativu Baguia, munisípiu Baukau.

Salvador Pires hateten, tékniku EDTL hanesan erói ne’ebé garante naroman hosi enerjia eletrisidade ne'ebé sai nu'udar nesesidade ema hotu nian.

"Durante ha’u-nia mandatu, ba ha’u funsionáriu hotu-hotu EDTL, liuliu iha distribuisaun ne’ebé mak servisu, fó sira-nia dedikasaun tomak atu asegura liña eletrisidade, hodi fó asesu enerjia eletrisidade ba ema hotu. Normalmente sira husik hela sira-nia família, feen no oan ki’ik ne’ebé presiza sira-nia domin, para sira presta servisu ba ema hotu, hodi asesu ba enerjia eletrisidade. Ba ha’u, sira hotu tékniku EDTL hanesan erói umanu ba ita-nia nesesidade, ne’ebé ita hotu presiza loro-loron. Sira husik hela sira-nia família, ho dedikasaun tomak ne’ebé presta durante ne’e", Salvador Pires informa.

Tanba ne'e,  MOP hatutan katak Tékniku EDTL merese hetan respeitu, no harohan ba Aman Maromak haraik fatin di’ak ba matebian horik rohan laek nian, no husu fó perdaun ba sala ne’ebé nia halo durante ne'e iha mundu.

Fonte: Mídia Ministério das Obras Pública (MOP)

Notísia Hotu-Hotu >