Dili, 03 Dezembru 2020 – Gabinete Apoiu Atividade Kónjuge Prezidente Repúblika (sigla portugés GAAC-PR) fó treinamentu ba inan-feto sira iha suku Madohi, postu-administrativu Dom Aleixo, Dili, kona-ba kulinária prepara ai-hán lokál no mós jestaun finanseira.

Treinamentu ne’e hala’o durante loron rua (2) hahú hosi 02 to’o 03 Dezembru 2020, no hetan partisipasaun máximu hosi inan-feto sira kuaze liu na’in-50 hosi postu-administrativu refere.

Fernanda dos Reis Soares hosi suku Komoro afirma katak treinamentu ba loron 2 ne’e importante tebes ba inan-feto sira atu nune’e bele iha esperiénsia kle’an liután kona-ba oinsá jere orsamentu no prepara ai-hán produtu lokál Timor-Leste ba família, turista lokál no internasionál.

Xefe Suku Madohi Bernardino de Cristo ‘Teki Timur’ reprezenta autoridade postu-administrativu Dom Aleixo no lori komunidade nia naran agradese ba GAAC-PR hodi dehan, “ha’u sente treinamentu ne’e di’ak tanba ba oin bele iha rezultadu ne’ebé pozitivu ba inan-feto sira. Tanba ne’e ba oin tenke aplika iha ita-nia família no ita-nia suku, maske tempu uitoan maibé importante mak tenke hatene no prátika”.

Treinamentu refere molok ne’e Gabinete hala’o tiha ona iha fatin seluk hanesan iha Manatutu, Likisá, Maliana no Atauru. Tanba ne’e, ba oin GAAC-PR sei hala’o formasaun hanesan ba fatin sira iha estrada ibun nune’e inan-feto sira bele hatene liután oinsá prepara ai-hán lokál ba vizitante.