UE Ameasa AstraZeneca Atu Lori Ba Tribunál Tanba La Kumpri Kontratu Produsaun Vasina Covid-19

28 Janeiru 2021 - BBC News haktuir katak Uniaun Europeia (UE) ameasa atu prosesa kompañia AstraZeneca ne'ebé prodús vasina Covid-19 nian ba tribunál tanba kompañia ne’e sei la konsege kumpri sira nia kompromisu hodi prodús vasina milliaun 100 iha trimestre dahuluk molok fulan Abríl 2021. Situasaun ne’e halo UE hirus no sira obriga kompañia refere atu fó tuir saida mak UE no AstraZeneca asina tiha ona iha kontratu.

AstraZeneca hateten katak sira iha fábrika haat ne’ebé opera iha rejiaun rua. Sira iha planta rua iha Reinu Unidu (RU) no rua seluk iha UE. Operasaun iha UE maka ladún la’o ho diak no nune’e halo produsaun vasina la másima, maibé planta rua iha RU funsiona ho diak no sei bele prodús vasina ho lalais.

UE lakohi atu hatene komplikasaun ida ne’e no eziji AstraZeneca atu ónra akordu hodi uja planta rua iha RU hodi halo produsaun ba vasina ne’e.

Iha parte seluk, guvernu hosi RU hateten katak sira kontente tanba AstraZeneca sei bele fornese vasina tuir kuantidade ne'ebé iha akordu no haksolok ho funsionamentu ho fábrika rua iha RU ne’ebé bele halo operasaun hanesan baibain.

Deklarasaun hosi guvernu RU ne’e, provoka EU nia reprezentante hodi dudu no eziji maka’as AstraZeneca atu kumpri kontratu ne’ebé asina tiha ona, se lae, mak UE sei prosesa kompañia vasina refere ba tribunál.

Fonte: BBC News

Notísia Hotu-Hotu >