Militár Myanmar Blokeia Tiha Asesu Ba Plataforma Mídia Sosiál Facebook No Seluk Tán

Myanmar, 05 Fevereiru 2021 – Hafoin halo tiha golpe estadu, Governu Myanmar ne’ebé lidera hosi militár, iha kinta (04/02) ne’e, haruka Internet Service Provider (ISP) sira blokeia tiha asesu ba plataforma mídia sosiál Facebook no seluk tán iha Myanmar.

Parte Facebook konfirma katak sira identifika ona blokeiu ne’e, enkuantu hosi parte NetBlocks ne’ebé monitora interupsaun internet iha mundu tomak hateten, ISP iha Myanmar la’os blokeia de’it Facebook maibé blokeia mós asesu ba Instagram no Whatsapp.

Ministru Komunikasaun no Informátika Myanmar liuhosi karta komunikadu ida hateten, sira blokeia asesu ba plataforma mídia sosiál ne’e to’o domingu (07/02) atu mantéin estabilidade.

“Oras ne’e ema perturba estabilidade nasionál, espalla notísia falsu no dezinformasaun ne’ebé kauza mal-entendidu entre utilizadór mídia sosiál,” nia hakerek iha karta ne’e.

Fonte: The Guardians

Notísia Hotu-Hotu >