Covid-19: Nain-5 Rekuperadu no Nain-14 Pozitivu Infetadu Foun

Dili, 11 Fevereiru 2021 – Pasiente Covid-19 na’in lima (5) hosi izolamentu Vera-krúz rekuperadu ona, maibé Ministériu Saúde rejista fali kazu pozitivu infetadu Covid-19 foun hamutuk 14 iha Timor-Leste, tuir Koordenadora Jerál Komisaun Covid-19 Odete da Silva Viegas informa ohin (11/2) iha Palácio das Cinzas.

“Ohin 11 Fevereiru 2021, hosi komisaun nasionál rejista tán kazu konfirmadu pozitivu Covid-19 hamutuk na’in-14, kompostu hosi feto ualu (8) no mane neen (6). Hosi na’in 14 ne’e sidadaun estranjeiru na’in rua (2) no seluk timoroan hotu inklui mós estudante na’in hitu (7). Entre sira ne’e, ida ne’ebé idade ki’ik liu mak 20 no idade boot liu mak 54. Sira hotu asintomátiku ka laiha sintomas,” Odete esklarese.

Nia informa tán, pasiente na’in-5 ne’ebé foin rekupera ne’e feto tolu (3) no mane rua (2). Ohin sira reintegra hikas ba ida-idak nia família, nune’e, pasiente ne’ebé oras ne’e baixa hela iha Timor-Leste sa’e ba na’in-38.

Fonte: Mídia Palácio das Cinzas

Notísia Hotu-Hotu >