Ekipa Konjunta Tuir Formasaun Kona-ba Hakoi Mate-Isin Pasiente Covid-19 Ho Seguru

Dili, 25 Marsu 2021 – Relasiona ho númeru pozitivu Covid-19 ne’ebé aumenta beibeik iha Timor-Leste, tanba ne’e, ekipa konjunta ne’ebé kompostu hosi Ministériu Solidariedade Sosiál no Inkluzaun (MSSI) no Ministériu Administrasaun Estatál (MAE) tuir ona formasaun ne’ebé fornese hosi parte Ministériu Saúde (MS) nian kona-ba oinsá hakoi mate-isin pasiente Covid-19 ho seguru, ne’ebé realiza ohin (25/3) iha edifísiu MSSI Kaikoli, Dili, enkuantu ba simulasaun hala’o iha Ospitál Lahane no Metinaru.

Diretór Jerál MSSI Rui Manuel Exposto hateten, formasaun refere ho objetivu prinsipál mak ekipa konjunta bele iha preparasaun no koñesimentu kona-ba oinsá bele kontrola no prevene infesaun hosi mate-isin pasiente ne’ebé karik mate tanba Covid-19, wainhira hala’o serimónia fúnebre, no atu nune’e parte hosi MSSI no MAE ida-idak bele hatene ona nia papél hodi atua karik situasaun ida ne’e mosu.

“Papél MSSI nian mak prepara kareta no motorista ba Carro Funerário inklui Kaisaun, papél MAE nian mak prepara rai no Covero hodi hakoi mate,” dehan Rui Exposto.

Nia akresenta, Ministériu Saúde nia papél mak tau-matan ba pasiente Covid-19 wainhira sei moras hela, maibé karik mate ona entrega ba ekipa hosi MSSI no MAE hodi hakoi.

Fonte: Ministério da Solidariedade Social e Inclusão (MSSI)

Notísia Hotu-Hotu >