UNTL Sei Gradua Médiku Timoroan Liu 1.000 Antes Tinan 2019 Remata

Díli, 8 Outubru 2019 - Universidade Nacional Timor Lorosa’e (UNTL), Fakuldade Medisina I Siénsia Saúde (FMSS) nia Escola Superior Medicina Geral (ESMG), sei kompleta alvu atu konsegue gradua médiku timoroan rihun ida (1000) iha tinan 2019.

Dekanu FMSS, Profesór José Dionisio Ximenes hateten alkanse ida ne’e posível tanba koperasaun di’ak ne’ebé hametin dezde tinan 2005 entre Estadu Timor-Leste no Estadu Cuba ne’ebe estabelese Escola Superior Medicina Geral iha UNTL atu forma Timor-Leste nia brigada médika rasik.

“Progresu husi koperasaun ne’e, FMSS nia Eskola Superiór Medisina Jerál konsege gradua ona médiku jerál nain atus sia ualunu resin neen [986]. Iha graduasaun iha novembru mai sei gradua tan nain tolunulu resin rua [32]. Liu ona alvu sanulu resin ualu [18],” hatutan Dekanu.

Profesór Dionisio salienta tan katak iha prosesu koperasaun ne’e, bazeia ba nesesidade, embora atu kontinua ba oin konforme desizaun Governu nian.

Responsável Brigada Cubana nian, no atuál Diretora ESMG, Profesora Belkis Samper Alonso, hatete katak koperasaun ne’e dezde tinan 2005 bazeia ba prinsípiu koperasaun no solidariedade entre nasaun rua Cuba no Timor-Leste.

“Benefísiu husi kooperasun ne’e mak sei forma mediku rihun ida (1000) ba Timor-Leste, no benefísiu ba parte Cuba maka habelár sira-nia prinsípiu solidaridade iha setór saúde nian,” heteten Diretora Belkis.

Iha apoiu ne’e atu kontinua ba oin ka la’e, Diretora Belkis hateten katak kabe ba koperasaun Estadu rai rua nian, Timor-Leste ho Cuba, no bainhira iha nesesidade.

Diretora Belkis haktuir mós katak preparasaun ba tranzisaun ne’ebe halao ona durante ne’e maka haruka ona médiku timoroan nain ualu (8) ba estuda iha Cuba hodi sai profesór iha medicina geral atu integra tuir mai iha ESMG iha FMSS-UNTL.

Fonte: Mídia Universidade Nacional Timor Lorosa'e (UNTL)

Notísia Hotu-Hotu >