Governu Sei Fó Subsídiu Internet Ba Estudante No Profesór Sira

Dili, 08 Abríl 2020 - Ministru Koordenadór ba Asuntu Ekonómiku (MKAE) iha ezersísiu, Fidelis Magalhães, hala’o aprezentasaun ba Konsellu Ministru relasiona ho planu ekonómiku, hodi hatan ba implikasaun negativa sira ne’ebé provoka hosi COVID-19 iha ekonomia nasionál.

Pokote hosi medida sira ne’e fahe ba área prinsipál 8 (ualu), inklui medida sira relasiona ho distribuisaun ba sasán esensiál sira, liña kréditu, izensaun fiskál no subsídiu ba sidadaun sira.

Área dahuluk hosi pakote medidas ne’e mak relasiona ho konetividade ne’ebé ho objetivu atu asegura kontinuidade ba fornesimentu transporte marítimu no áereo hodi garante abastesimentu nasionál hosi merkadoria.

Área daruak mak distribuisaun sasan esensiál sira, espesiál liu ba ai-han, aimoruk no ekipamentu klínika sira nian.

Área datoluk hosi atuasaun refere ba garantia hosi kontinuidade fornesimentu ba servisu telekomunikasaun iha ne’ebé Governu sei fó subsídiu internet ba estudante no profesór sira.

Área dahaat, refere ba medida alíviu fiskál, hanesan adiantamentu ka suspensaun temporária hosi obrigasaun fiskál, ho forma hamenus todan ba empreza no konsumidór sira.

Área dalima hosi atuasaun, foka ba servisu utilidade públika, ho partisipasaun ka suspensaun ba pagamentu servisu fornesimentu eletrisidade no bee.

Área seluk tan tuir mai ko’alia kona-ba despeza públika, krisaun liña kréditu no asisténsia direita.

Fonte: Mídia Secretário de Estado Para a Comunicação Social (SECOMS)

Notísia Hotu-Hotu >