Espoza PR Apoia Nesesidade Báziku Ba Uma-Kain Kbiit-Laek 25 Iha Suku Hera

Dili, 16 Maiu 2020 - Espoza Prezidente Repúblika Cidália Nobre Lopes Mouzinho Guterres, liuhosi gabinete Apoiu Atividade Kónjuge – Prezidente Repúblika (sigla portugés, GAAC-PR) no Fundasaun SADIA, apoia nesesidade báziku ba komunidade kbiit-laek uma-kain 25 iha aldeia Akanunu, Mota-Kiik no Hali-Dolar suku Hera, postu-administrativu Kristu-Rei, Dili.

Iha tinan ida ne’e, Timor-Leste hasoru dezastre naturál hanesan inundasaun, komunidade barak mak sai vítima, alein hosi ne’e, surtu mundiál ka Covid-19 ne’ebé halo komunidade barak la hala’o atividade, nune’e implika tebes ba sira nia moris, liuliu hán no hemu loro-loron. Tanba ne’e GAAC-PR no Fundasaun SADIA servisu hamutuk ho autoridade lokál no veterana balu rekolla dadus família kbiit-laek hodi hetan tulun no hakmaan netik sira nia nesesidade loron-loron.

“Ko’alia kona-ba han no hemu, iha situasaun ida agora presiza ita lolo-liman ba malu nafatin, tantu hosi viziñu ba viziñu, sira ne’ebé iha kbiit, apoiu netik maun-alin sira ne’ebé laiha kbiit. Tanba ne’e ita nia asaun karidade no asaun solidaridade hosi maluk timoroan, organizasaun ka individu ba família kbiit-laek, atu nune’e hotu-hotu iha sentidu hanesan ba situasaun ida agora ita hasoru”, hato’o Espoza Prezidente Repúblika.

Fonte: Mídia Gabinete Conjuge do PR

Notísia Hotu-Hotu >