Prezidente EUA Donald Trump Pozitivu Ba Covid-19

Dili, 02 Outubru 2020 – Prezidente Estadus Unidus Amérika Donald Trump pozitivu infektadu Covid-19, tuir informasaun ne’ebé CNN Internasionál fó sai.

CNN haktuir, Donald Trump informa iha nia konta ofisiál Twitter katak nia pozitivu ba Covid-19.

“Kalan ne’e, FLOTUS no ha’u teste pozitivu ba Covid-19. Ami sei hahú kedas prosesu kuarentena no rekuperasaun. Ami sei hakat liu ida ne’e hamutuk!”, Trump informa ida ne’e, ohin (2/10), liuhosi nia konta ofisiál Twitter.

Molok ne’e, iha informasaun katak Trump no Melania sei kumpri kuarentena hafoin Konselleiru Prezidénsiál ne’ebé besik tebes Trump, Hope Hick, pozitivu infektadu ba Covid-19.

Trump no nia espoza hala’o teste ba Corona iha kinta (1/10) kalan, no nia rezultadu sai ohin katak Trump hetan rezultadu pozitivu ba Covid-19.

Fonte: CNN

Notísia Hotu-Hotu >