SEA Ho Lia-Na'in Sira Halo Rituál Tara-bandu Iha Hatu-udu Hodi Proteje Ambiente

Dili, 16 Outubru 2020 - Sekretáriu Estadu Ambiente (SEA) Demetrio de Carvalho hamutuk ho lia-na'in no komunidade sira, ohin (16/10), halo rituál tara-bandu ba suku Leo-lima no Ai-liku, iha postu-administrativu Hatu-udu, munisípiu Ainaru.

Objetivu hosi rituál ne'e mak atu reativa tara-bandu  hodi haforsa tán lei tara-bandu ne'ebé iha tiha ona, atu bele proteje área sira hanesan lagoa, bee-matan lulik, ai-laran tuan sira ne'ebé mak sei orijinál hela, iha suku rua ne'e.

Demetrio de Carvalho iha intervensaun hateten, Lia-na'in sira iha podér kulturál atu fanun lulik sira hodi reforsa tara-bandu refere, tanba tara-bandu ne'e matenek ne'ebé bei-ala sira rai hela  atu hametin kapitál sosiál, polítika, ekolójiku no kulturál Timor nian.

" Funsaun tara bandu,trata relasaun ema ho ema, trata relasaun ema ho natureza no trata relasaun ema ho estadu. Ita mai hosi jerasaun pasadu no hosi ita mak sei mosu jerasaun futuru nune'e ita iha devér atu kuida ambiente nune'e futuru jerasaun la sofre konsekénsia hosi estragus ambientál ne'ebé ita halo agora, tara-bandu sei tulun ita atu kuida ambiente", Demetrio hatutan tán. 

Fonte: Mídia Sekretariu Estadu Ambiente (SEA)

Notísia Hotu-Hotu >