Igreja Rua Iha Chile Hetan Sunu Hosi Manifestante Sira

Chile, 23 Outubru 2020 – Igreja rua hetan sunu wainhira akontese manifestasaun boot iha Santiago, Chile, ne’ebé hamosu tiha asaun violentu. Demonstrasaun ne’e akontese hafoin ema rihun resin tún ba dalan hodi komemora no hanoin hikas movimentu protestu boot ida hodi ezije igualdade ne’ebé akontese iha tinan kotuk hodi hamate tiha ema 30 no hakanek ema rihun resin.

Manifestasaun ne’ebé akontese iha Domingu (18/10) ne’e inisialmente hakmatek hela iha kapitál Santiago. Maibé, iha insidente violentu ka asaun vandalizmu ne’ebé akontese fali iha parte loro-kraik, hodi rezulta igreja ida iha Santiago hetan sunu, enkuantu igreja ida seluk sofre estragus lubuk ida hosi ahi ne’ebé manifestante sira hada’et ba tán, maibé bombeiru sira konsege kontrola hodi hamate tiha.

Tuir informasaun ne’ebé mídia hosi fatin refere fó sai katak igreja ki’ik, Church of the Assumption, ne’ebé hetan estragus totál tanba manifestante sira sunu ne’e, koñesidu hanesan ‘parókia artista’.

Fonte: Detik News

Notísia Hotu-Hotu >