PR Parabeniza Graduandu IOB No Husu Atu Uza Koñesimentu Hodi Serví Ba Dezenvolvimentu

Dili, 19 Novembru 2020 – Iha serimónia graduasaun ne’ebé Institute of Business (IOB) realiza ohin (19/11) ba dala-XIII, ba Fakuldade Ekonomia no Negósiu, Prezidente Repúblika (PR) Francisco Guterres Lú Olo, liuhosi mensajen, hato’o parabéns ba Finalista hirak ne’ebé gradua ona, no ba mós sira-nia família.

“Ohin, loron espesiál ida ba Graduandu sira hosi Fakuldade Ekonomia no Negósiu, IOB nian! Parabéns ba imi ida-idak, feto no mane! Imi-nia susesu fó orgullu ba inan-aman sira, enkarregadu edukasaun sira no familiár sira seluk! Ida ne’e orgullu ida mós ba ita-nia Nasaun Timor-Leste!”, dehan PR Lú Olo, iha nia mensajen ne’e.

PR Lú Olo mós husu Graduandu sira atu uza koñesimentu ne’ebé sira hetan hodi serví ba dezenvolvimentu nasionál.

“Ba oin imi tenke uza imi-nia koñesimentu no buat hotu-hotu ne’ebé imi aprende, iha tinan hirak liubá, hodi serví ba dezenvolvimentu nasionál”, PR Lú Olo salienta.

Entretantu, PR Lú Olo la marka prezensa iha serimónia graduasaun ne’e tanba halo hela vizita ba komunidade iha munisípiu Ermera.

Fonte: Mídia Presidente da República (PR)

Notísia Hotu-Hotu >