Manufahi, 03 Dezembru 2020 – Família Proklamadór saudozu Francisco Xavier do Amaral hamutuk ho autoridade nasionál no lokál inklui komunidade sira, ohin (03/12), realiza serimónia lansamentu ba distribuisaun dahuluk livru biografia no istória moris Proklamadór Xavier nian iha postu-administrativu Turiscai, munisípiu Manufahi.

Iha serimónia lansamentu ba distribuisaun livru ne’e, Diretór Esterna Komunikasaun no Advokasia Sentru Nasionál Chega (sigla portugés CNC) Gaudencio Sousa hatutan Prezidente Repúblika Francisco Guterres Lú Olo nia mensajen ba partisipante sira katak, nu’udar sidadaun tenke buka hateten no deskobre istória luta Timor-Leste nian iha pasadu.

“Timor-Leste labele nega katak saudozu Francisco Xavier do Amaral pertense mós ba pasadu, nu’udar figura istóriu ba povu Timor-Leste”, Prezidente Repúblika temi iha nia mensajen ne’ebé Gaudencio lee.

Aniceto Guro-Berteni Neves nu’udar peskizadór no hakerek-na’in ba livru biografia no istória moris Francisco Xavier do Amaral hateten, prosesu peskiza hodi hakerek livru ne’e gasta tempu durante tinan rua nia laran, no rekolla informasaun sira hosi líder istóriku sira ne’ebé sai sasin hanesan Mari Alkatiri, José Ramos Horta, Abilio Araújo, Kay Rala Xanana Gusmão, José Luis Guterres no seluk tán.

Afonso Sarmento ho kódiku ‘Dadulas’, nu’udar família hosi saudosu Xavier hateten, nia agradese ba parte hotu-hotu liuliu ba peskizadór no hakerek-na’in ne’ebé konsege hakerek ona livru Xavier nian.