AFM Realiza Torneiu Taxa Futeból Juveníl Sub-16 Iha Munisípiu Manufahi

Manufahi, 19 Dezembru 2020 – Asosiasaun Futeból Manufahi (AFM) halo abertura ba torneiu taxa Futeból juveníl sub-16 ne’ebé envolve klube hamutuk 17, iha sábadu (19/12) ne’e, iha estádiu futeból Ailuli Same, munisípiu Manufahi.

Hosi klube 17 ne’e AFM fahe ba grupu haat. Eziste klube haat iha kada grupu A, B no C, no klube lima mak iha grupu D.

Iha diskursu, Prezidente AFM Arão Noe Amaral agradese ba Federasaun Futeból Timor-Leste (FFTL) tanba fó ona apoiu finanseiru ho montante dólar amerikanu rihun lima ($5.000) ba AFM hodi realiza torneiu ne’e.

Administradór munisípiu Manufahi, Arantes Isaac Sarmento, iha diskursu, nia husu ba jogadór sira atu hatudu kualidade profisionál iha jogu hodi prepara-an atu sai futebolista di’ak iha Manufahi no Timor-Leste.

Iha jogu dahuluk ba abertura ne’e, klube ho naran Nusen joga kontra klube Teravy, no rezultadu ikus, klube Nusen manán ho golu 2 no klube Teravy golu 1. Kompetisaun ne’e realiza iha semana ida dala rua, no joga iha loron sábadu no domingu iha tempu loro-kraik.

Fonte: Diáriu "Roman ba Sosiedade" Manufahi

Notísia Hotu-Hotu >