Dili, 21 Janeiru 2021 – Tékniku Eletrisidade Timor-Leste (EDTL), E.P. munisípiu Baukau hetan tuda hosi ema deskoñesidu iha kinta (21/01) ne'e iha tuku 9:00 kalan wainhira halo hela atendimentu ba avariasaun liña enerjia eletrisidade iha suku Buibau, postu-administrativu Baukau Vila, munisípiu Baukau, haktuir informasaun hosi mídia EDTL.

Atitude hosi ema deskoñesidu ne'e rezulta kareta operasionál EDTL nia vidru rahun tiha, no kondutór ne'ebé nu'udar mós tékniku EDTL ida nia liman kanek.

Parte EDTL konsidera, asaun ne'ebé sira hasoru ne'e hatudu katak kooperasaun hosi komunidade sira iha área refere ladún di'ak no la tulun tékniku EDTL sira hodi halo atendimentu ba avariasaun sira.

Maske nune'e, parte EDTL nafatin husu ba públiku atu apoia no fasilita servisu tékniku EDTL nian iha terenu.