Uma Kbiit-Laek Ba Munisípiu Dili Nian Sei Halo De’it Ba Metinaru No Ataúru

Dili, 18 Fevereiru 2021 – Diretora Sekretariadu Tékniku Programa Nasionál ba Dezenvolvimentu Suku (ST-PNDS) Nasionál Claudinha Pinto hateten, Governu sei harii uma kbiit-laek ba munisípiu hotu-hotu iha teritóriu Timor-Leste, maibé ba munisípiu Dili Governu sei harii de’it uma kbiit-laek ne’e iha postu-administrativu Metinaru no Ataúru.

“Tuir polítika Governu nian katak implementa iha teritóriu Timór laran tomak exeptu iha Dili ne’e mak ita halo de’it ba Metinaru Ho Ataúru,” Diretora ST-PNDS Nasionál informa ba jornalista Timor News iha kinta (18/2) ne’e iha nia knaar-fatin, Kolmera, Dili.

Nia esplika, polítika implementasaun uma-kbiit laek iha Dili nian ba Metinaru no Ataúru de’it, nune’e rezulta aldeia hamutuk 424 iha Timor-Leste ne’ebé mak sai alvu ba uma-kbiit laek hosi Governu iha faze dahuluk, no kada aldeia sei hetan uma tolu (3).

“Iha tinan ida ne’e ami sei halo uluk uma hamutuk 1272 no to’o Dezembru ami tenke konklui,” nia akresenta.

Fonte: Timor News

Notísia Hotu-Hotu >